【占卜師手記】你唔係唔知，只係唔想信

曾經有個客人搵我占卜，想問：「佢仲會唔會返嚟？」

我睇完牌之後，好清楚咁同佢講：對方其實已經有第二個人，只係暫時未講清楚、未正式斷清關係。呢段感情，基本上已經完咗——唔係冇感覺，但已經唔係適合再繼續。

我同佢講得好直接：「你如果而家主動搵佢，只會撞正啲你未準備好接受嘅事。不如暫時抽離，靜一靜，俾自己多啲空間。」

佢聽完話：「我忍得住。」

但唔夠一個星期，佢就 send 咗句「我仲掛住你」俾對方。結果唔止冇回覆，仲被 block。

真正最傷，係之後一位共同朋友 send 咗佢一張 screenshot：對方喺 IG close friend 限動入面放咗張相，入面係佢同新歡貼身自拍，笑容甜到心都痛。

我成日都同客人講：占卜唔係用嚟改變對方，而係提醒你——幾時應該保護自己。

你可以未放低，但至少要知，唔應該再用你真心，去換一段唔會回應你嘅感情。